ஐபிஎல் தொடக்க ஆட்டத்தில் ஆர்சிபி அணியுடன் இன்று மோதல்: ருதுராஜ் தலைமையில் களமிறங்குகிறது சிஎஸ்கே

சென்னை: ஐபிஎல் டி20 கிரிக்கெட் தொடரின் 17-வது சீசன் போட்டிகள் இன்று தொடங்குகிறது. சென்னை சேப்பாக்கம் எம்.ஏ.சிதம்பரம் மைதானத்தில் நடைபெறும் முதல் ஆட்டத்தில் நடப்பு சாம்பியனான சென்னை சூப்பர் கிங்ஸ் (சிஎஸ்கே) - ராயல் சேலஞ்சர்ஸ் பெங்களூரு (ஆர்சிபி) அணிகள் பலப்பரீட்சை நடத்துகின்றன.

ஐபிஎல் டி20 கிரிக்கெட் தொடரின் 17-வது சீசன் சென்னை சேப்பாக்கம் எம்.ஏ.சிதம்பரம் மைதானத்தில் இன்று இரவு கோலாகலமாக தொடங்குகிறது. இதில் தலா 5 முறை சாம்பியன் பட்டம் வென்றுள்ள சென்னை சூப்பர் கிங்ஸ், மும்பை இந்தியன்ஸ், இரு முறை வாகை சூடியுள்ள கொல்கத்தா நைட் ரைடர்ஸ், தலா ஒரு முறை கோப்பையை கைப்பற்றியுள்ள ராஜஸ்தான் ராயல்ஸ், சன் ரைசர்ஸ் ஹைதராபாத், குஜராத் டைட்டன்ஸ் ஆகிய அணிகளுடன் ராயல் சேலஞ்சர்ஸ் பெங்களூரு மற்றும் பஞ்சாப் கிங்ஸ், டெல்லி கேபிடல்ஸ் ஆகிய 10 அணிகள் கலந்து கொள்கின்றன.