உலக செஸ் சாம்பியன்ஷிப்பில் குகேஷ் பட்டம் வெல்லக்கூடியவராக இருக்கலாம்: சொல்கிறார் டிங் லிரென்

புடாபெஸ்ட்: உலக செஸ் சாம்பியன்ஷிப் வரும் நவம்பர் 20 முதல் டிசம்பர் 15-ம் தேதி வரை சிங்கப்பூரில் நடைபெற உள்ளது. இதில் நடப்பு சாம்பியனான சீனாவின் டிங் லிரெனுடன், இந்திய கிராண்ட் மாஸ்டரான 18 வயதான டி.குகேஷ் மோதுகிறார்.

மதிப்புமிக்க உலக செஸ் சாம்பியன்ஷிப்பில் இந்தியாவின் விஸ்வநாதன் ஆனந்த் 5 முறை வாகை சூடியுள்ளார். அவருக்கு பின்னர், உலக செஸ் சாம்பியன்ஷிப்பில் இந்தியாவில் இருந்து தற்போது குகேஷ் கலந்து கொள்ள உள்ளார். குகேஷ் தற்போது, ஹங்கேரியின் புடாபெஸ்டில் நடைபெற்று வரும் 45-வது செஸ் ஒலிம்பியாட் போட்டியில் விளையாடி வருகிறார். அவரை உள்ளடக்கிய இந்திய ஆடவர் அணி முதல் 5 சுற்றுகளிலும் வெற்றி பெற்றுள்ளது.