பெங்களூரு: ஐபிஎல் டி20 கிரிக்கெட் தொடரில் ராயல் சேலஞ்சர்ஸ் பெங்களூரு அணியிடம் 23 ரன்கள் வித்தியாசத்தில் தோல்வி அடைந்தது டெல்லி கேபிடல்ஸ் அணி. அந்த அணி தொடர்ச்சியாக சந்தித்த 5-வது தோல்வி இதுவாகும்.
பெங்களூரு சின்னசாமி மைதானத்தில் நேற்று நடைபெற்ற இந்த ஆட்டத்தில் டாஸ் வென்ற டெல்லி அணியின் கேப்டன் டேவிட் வார்னர் பீல்டிங்கை தேர்வு செய்தார். முதலில் பேட் செய்த பெங்களூரு அணியானது நிர்ணயிக்கப்பட்ட 20 ஓவர்களில் 6 விக்கெட்கள் இழப்புக்கு 174 ரன்கள் குவித்தது. தனது 47-வது அரை சதத்தை விளாசிய விராட் கோலி 34 பந்துகளில், ஒரு சிக்ஸர், 6 பவுண்டரிகளுடன் 50 ரன்கள் விளாசினார். கிளென் மேக்ஸ்வெல் 14 பந்துகளில், 3 சிக்ஸர்களுடன் 24 ரன்களும், கேப்டன் டு பிளெஸ்ஸிஸ் 22, மஹிபால் லாம்ரோர் 26, ஷாபாஷ் அகமது 20, அனுஜ் ராவத் 15, ஹர்ஷால் படேல் 6 ரன்கள் சேர்த்தனர். தினேஷ் கார்த்திக் தான் சந்தித்த முதல் பந்திலேயே ஆட்டமிழந்தார்.
0 கருத்துகள்