அமெரிக்க ஓபனில் சாம்பியன் பட்டம் வென்ற அல்கராஸ் உலகத் தரவரிசையிலும் முதலிடத்தை பிடித்தார்

நியூயார்க்: அமெரிக்க ஓபன் டென்னிஸ் தொடரின் ஆடவர் ஒற்றையர் பிரிவில் ஸ்பெயினின் 19 வயது வீரரான கார்லோஸ் அல்கராஸ் சாம்பியன் பட்டம் வென்று சாதனை படைத்தார். மேலும் உலகத் தரவரிசையிலும் அவர், முதலிடத்தை பிடித்தார்.

அமெரிக்காவின் நியூயார்க் நகரில் நடைபெற்ற இந்தத் தொடரின் ஆடவர் ஒற்றையர் பிரிவு இறுதி சுற்றில் 3-ம் நிலை வீரரான ஸ்பெயினின் கார்லோஸ் அல்கராஸ், 7-ம் நிலை வீரரான நார்வேயின் காஸ்பர் ரூடை எதிர்த்து விளையாடினார். 3 மணி நேரம் 20 நிமிடங்கள் நடைபெற்ற இந்த ஆட்டத்தில் கார்லோஸ் அல்கராஸ் 6-4, 2-6, 7-6(7-1), 6-3 என்ற செட் கணக்கில் வெற்றி பெற்று சாம்பியன் பட்டம் வென்றார்.