சென்னை: 6-வது கேலோ இந்தியா இளைஞர் விளையாட்டு போட்டியில் நேற்று சென்னை மேலக்கோட்டையூரில் உள்ள தமிழ்நாடு உடற்கல்வியியல் மற்றும் விளையாட்டு பல்கலைக் கழகத்தில் நடைபெற்ற சைக்கிள் பந்தயத்தில் 500 மீட்டர் டைம் டிரையல் பிரிவில் தமிழகத்தின் தூத்துக்குடி மாவட்டம் ஒட்டாபிடாரத்தைச் சேர்ந்த ஜே. ஸ்ரீமதி (0:39.702) தங்கப்பதக்கம் வென்றார். ராஜஸ்தான் மாநிலத்தைச் சேர்ந்த ஜி. விம்லா மச்ரா (0:40.211) வெள்ளிப் பதக்கமும், தமிழகத்தின் கோவையைச் சேர்ந்த ஆர். தமிழரசி (0:41.028) வெண்கலப் பதக்கமும் வென்றனர்.
மகளிருக்கான அணிகள் ஸ்பிரின்ட் பிரிவில் தன்யதா, ஸ்ரீமதி, தமிழரசி, சுவேதா ஆகியோரை உள்ளடக்கிய தமிழக அணி பந்தய தூரத்தை 1:20.036 விநாடிகளில் கடந்து தங்கப் பதக்கம் வென்றது. ராஜஸ்தான் (1:20.528) வெள்ளிப் பதக்கமும், மகாராஷ்டிரா (1:20.814) வெண்கலப் பதக்கமும் கைப்பற்றின.
0 கருத்துகள்